الي روح محمد عمر ...والد زميلنا الممثل الفنان عبد الخالق محمد عمر ...والذي أغتيل مطعونا في مسجد بالكلاكله القُبه
(نص اول )
دقت مزامير الحزن
والشارع المكسور
السكه تنده ليك
في القُبه جمب السور
لي وين مفارق الناس
سايب الوطن مشرور
لمتين سكات الناس
والساقيه تاني تدور
يابوي غطي الراس
قبال يجيك الدور
*****************
طعم الفريق لايوق
والباقي منك شوق
فاتح نهاري بيوت
ادخل تعال يا زول
اللمه منتظراك
البُن يقالد الكيف
اركز امام القيف
وارشف رزازنا براك
النيل يضاري الليل
والقمره جوه سماك
ضاويّه البحر بالحيل
*******************
شوفناك هداك حبيب
شايل معاك ازميل
واللوحه تبقي قريب
والبينا كان اكليل
يابوي هسه وين
مزامير الحزن والبوح
ضو العشم قنديل
سيرة الحنين والروح
بكتني فيك سنين
**************
اطفال الحله
متلمين
قالولنا راح لي وين؟
قالولنا ما رايحين
بندور نقابلو لحين
حين يكمل حصان الطين
يابوي ....حقو تبين
************
ولو شوفت في الخرطوم
مزامير الحزن ضجّت
كل الخلق قاصدين
غيماتك الصبّت
*************
شلناك في العينين
شوفناك تنزف دين
دين الوطن والزين
ولسه في الخرطوم
سايقانا غافلة هم
سايقانا وين لي وين
سايقانا ما عارفين
خلونا مشغولين
قسمو البحر نصين
قسموه بي سكين
كل النجوم شاهدين
كتلووه امام العين
وأترملو النيلين
وصلبوهو ناس تانيين