العطش .... ( محاوله روايه )

عدد الرسائل : 216 تاريخ التسجيل : 30/03/2007

و نهضنا ... وانفجرت نسرين بالبكاء , غالبت دموعى والتفت

اليك يا منعم ... لحظتها , عرفت ان كل خلية فيك تشكو

من العطش ... كنت تحدق خلفى تماما ... التفت , رأتها ...

رأيت سلمى .. كيف كانت قريبه منى لهذا الحد ولم احس

بسريانها ذاك العنيد فى عروقى ... كيف لم احس بدبيب نبض

العشق يموسق نبض القلب حال اقترابها منى .. لم تنطق هى - سلمى -

بشى .. اخذت بيد نسرين وقادتها لداخل المنزل ... ساد الصمت

بيننا طويلا .. والنذير يقود العربه بتوتر ملحوظ وصوت مصطفى

يغنى ..

( قطع شامة هواك من قلبو ..

الا هواك نبت تانى

وملا الساحات .. )

وبدون اتفاق مسبق اوقف النذير العربه امام احد

الكافتريات المطله على النيل ...

عدد الرسائل : 216 تاريخ التسجيل : 30/03/2007

نزلنا ... طلب النذير القهوه , التفت انت الى النادل

مصححا ...

- شاى ... عاوز شاى ساده ..

باغتك النذير بالسؤال ...

- لاقيت سلمى الفتره دى ..

- آخر مره اتلاقينا كان معانا احمد ... فى الميدان الشرقى

تتصوروا !... كنا بنتكلم عن الموت ... عن الناس الاختاروا الموت

... مايكوفسكى , وعبد الرحيم ابوذكرى والعلاقه البيناتم ... احمد كان

بفتكر انو فى بعد صوفى فى الموضوع ... الحقيقه المطلقه البنمشى

ليها بغض النظر عن الاداة المستخدمه فى فعل الموت نفسو ...

ممكن تقع من الطابق العاشر , وممكن تتكيف ذهنيا مع الموت

وتموت .. وده بفسر موت المبدعين بدرى ... عبدالعزيز العميرى

مثلا ... اصرار محمود محمد طه كان برضو جزء من مشيهو

للحقيقه المطلقه .... موت صلاح احمد ابراهيم بعد على المك

بشويه ... والناس الاقل شفافيه بختاروا الغياب كموت بديل ...

والناس الماعندهم شفافيه بقعدوا ... عثمان مالك ساكت ؟...

رشفت من فنجانى وانا ما زلت امد بصرى فى الظلام

الكثيف اليلف توتى ... ثم قلت

- عارفين انو غياب احمد خلانى اكتشف انو موجود فى

حياتى بصوره غريبه ... تفاصيلى كلها ما بتم الا بيهو .. احمد

كان هادى فينى ... جزء كبير من فهمى للحاجات كان من

تاثير احمد على .... زى فنان كان بلون فينا بى ريشتو , وبدون ما

نحس نطلع اجمل ... يا الله يا احمد ...

عدد الرسائل : 216 تاريخ التسجيل : 30/03/2007

وتحدثنا كثيرا ليلتها .. ضحكنا طويلا , وطويلا مارسنا

الحزن .. وقبل ان نفترق قال النذير

- غريبه انو نضحك ... بس كنت حاسس انو احمد

كان بضحك معانا ... الايام الفاتت كنت بحس بالذنب

لو لقيت نفسي بضحك ...

التفت يا منعم محمود اليه قائلا

- يا عزيزى ... عندما تصبح التجربه اقوى من الالم ...

ينمحى الاحساس بالذنب

صاح فيك النذير

- انت الكلام ده بتجيبو من وين ؟!..

رددت عليه

- محمد شكرى ... رواية وجوه , عندى فى البيت

وحاديك ليها ... بس تقراها كويس

بعدها ما افترقنا قط .. الا بعد رحيلك الحزين

عن امدرمان ... حبلك السري ... او عن تلك الشامه التى قطعتها

من قلبك , فازهرت بستان عشق فى باحة روحك العطشى ... سلماك العصيه

... وسلماى المستحيل

وها انذا اعود اليك يا خرطوم .. ليس فى يدى سواك

ماذا بيديك لى .. ايتها اللعينه

عدد الرسائل : 216 تاريخ التسجيل : 30/03/2007

منعم محمود

الدنيا ليل .. غربه ومطر , وها أنت يا منعم محمود

- وفى كل المساءات الغريبه - تعود , لرحم الارض امدرمان .... ولمدارات

خروجك الحزين ظهيرة النحيب الموغل فيك ابدا ... وها أنت الغريب فى

المدن الغريبه لا شى سوى جرثومة متحوصله فى كبد الغياب ...

لا تمنع الذكري , ولا تقوي على هذا المطر الشجين ... وسلمى

... عليها اللعنه , مازالت تمارس ايغالها الموحش فيك بذات هدوؤها

المستفز ... الواثق ... الشفيف , سلمى العصيه على كل الكؤوس ,

والسافات البعيدة ... و الرحيل , هل كنت تحبها حقا ؟... حدث منعم

نفسه هازئا بالاجابات المعلبه ... راقب جيدا احتقان السؤال على زجاج

النافذه .... ابتسم بمرارة لصورته الشبحيه المنعكسه على زجاج النافذه قبل

ان ينتبه ل ( آنَا ) وهى تحييه بحميميتها الدافقه

عدد الرسائل : 216 تاريخ التسجيل : 30/03/2007

تفت به آنا

- عزيزى منعم كيف حالك اليوم ... لا تبدو بحال جيده رغم

الابتسامه .... هل تذكرت احدى الخائنات

- عزيزتى آنا .. كم انت ماكره , لكنه ريتشارد من يدفع ثمن

ذلك ... اليس كذلك ؟ كيف حاله

- ليس لديه الكثير هذه الايام ليورط نفسه فيه ... ولكن ما الذي

اتى بك باكرا هذه الليله ؟...

- هناك موعد ... ولكن وكما قلت لك نحن قد نلتزم باى شى

الا المواعيد

- وهل يوجد شى آخر تلتزمون به .. انتم الافارقه لا تتعلمون

ابدا

- دعك منا ... والان اين ليزا لتاتينى بالبيره البارده ... اما انت

يا عزيزتى فلتذهبى لافريقيا لاستعمارها من جديد ,, ولا تنسى

ريتشارد

- ولماذا اذهب وانتم هنا !.. ما رائيك سأبدأ بك الان ... وان

كنت لا اثق بالنتائج ... اووه عزيزي المسكين منعم , كلهم يأتون

هنا ليفرحوا قليلا الا انت , تشرب كثيرا كى تحزن ... البارحه

سألتنى احداهن عنك , من هذا الاسود الوسيم , رأيت بعينيها

بريق لهفة فنصتحها بالرحيل لاقصى قرية فى الشمال لتطفى لهيبها

فى الثلوج هناك ...

اذا رحلت ... فسنلتقى , فانا يا عزيزتى الراحل الابدى عبر

المساءات الغياب .. والمسافات العصية , والابتلاء ... ولكن لماذا تأخر

محمود ؟... تمتم منعم لنفسه وهو يتامل الذهبى ذو الرغوه

العنيفه .. جرع منه وهو يدعى الانصات ل آنا وهى تمارس ثرثرتها

الاليفه حتى اقتحمهم محمود فجأة ... كان شديد الاشراق كأنه نازل

للتو من السماء , حاضر الوسامة والالق ... وحميم جدا هذا

المحمود ...

- معليش على التأخير .... الجو سى جدا مش كده , كيف

حالك يا آنا

- بخير كيف حالك انت ؟.. ها قد اتى صديقك , فلتسعد

- انا اسعد بك حقا يا آنا

جلس محمود بعدما عاد بكأس ... وعينيه ما زالت تومض بشده ..

عرفت ان لمحمود ما يخفيه .. تعمدت الا اسأله لاخبتر قدرتى على

الصبر ... ورحنا نثرثر

عدد الرسائل : 216 تاريخ التسجيل : 30/03/2007

- كيفك يا محمود , وكيف ساميه وهبه

- كويسين ... ساميه مصره ارجع بيك فى يدى , بكره اجازه

وما عندك ايى طريقه للزوغان

- خلينى بكره اجى اتغدى معاكم ... اصلا مشتاق جدا لى هبه

- هبه حتفرح بيك ... تصور بقت تقول اسمك بطريقه لذيذه

( اموو موونئيم ) ... لكن ما عندك طريقه .. حتمشى معاى الليله

ساميه عامله حسابك على العشا , وبكره يوم مفتوح وعندها ليك

مفاجئه .. الموضوع ده محسوم , سمعت تصريح الطيب الخير

الاخير ؟...

- ابدا ... لكن بتوقع يحصل انشقاق فى حزبهم قريب

- اتوقعت المساله دى كيف ؟... التصريح فعلا هجوم عنيف على

القياده ... مع انو كان اقرب الشباب للسِد ..

- شوف يا محمود ... الطيب عندو جلابيه لكل مرحله ...

بغير جلدو كل ما يحس انو ضاق عليهو ... بكره حيطلع

ليهو بيان وينشق مع مجموعتو ... بعد بكره يرجع الخرطوم ...

وحينتهى وزير ... حساباتو دقيقه جدا ... ايام الجامعه كان

صوتو اعلى مننا .... كان صوره مثاليه لمناضل شرس وعنيف ..

لكن تتصور انو اصلا ما تم اعتقالوا ... بعد الجامعه اتفاجأنا

بانضمامو للحزب الكبير .... نفس الحزب الكان بهاجمو ... استقبلوه

هنا استقبال الابطال ... ومشى فى الحزب بسرعه الصاروخ ....

لو عرفتو يا محمود حتلقى دكتاتور كبير جواهو ... هو مثابر

لكن افقو السياسى ضيق جدا ... ولو رصدتو كويس حتلاقيهو

حايم فى كل المواضيع بى بره ... حياتو ما اتجاوز اليافطه

والشعارات ... عندو ذاكره فوتوغرافيه للاحداث , لكن قدرتو على

التحليل صفر ... صدقنى يا محمود النوع ده خطير جدا

وللاسف , بوصل لاهدافو ... دى يا محمود مأساة بلد زي

السودان

عدد الرسائل : 216 تاريخ التسجيل : 30/03/2007

- عارف يا منعم ده كلام غريب !... انا لاقيتو

كم مره وكان دايما بسألنى عنك ... بذكر آخر مره

هاجمك بى شكل غريب ... هو بفتكر انك نزلت من

قطر النضال فى محطة الجامعه ... ده تعبيرو بالظبط

انا افتكرت انو الموضوع نوع من الزعل منك والاهتمام

بيك ... بس يا منعم بغض النظر عن الجزء الغير

معلن فى هجومو عليك .. لكن

- عاوز تقول انو فيهو جزء من الحقيقه ...

عارف يا محمود قصة القطر دى هى ذاتها المشكله ...

المسار الواحد البوصل لى محطه واحده حددتها السلطه فى

السودان ... السلطه بى معناها الواسع , البتلمهم كلهم

حكومه , معارضه , احزاب , عساكر و حركات عسكريه , بيوتات كبيره

وتجار زيت وسماسره .... ونحن ما مسموح لينا الا بى خيارهم الواحد

ده , يا نركب معاهم او يجردونا من الالقاب والنياشين ...

وحتى لما نتناول خيارهم ده فى النقاش معاهم ما مسموح

لينا بى نقاش افقى فى ارضيه واحده , لانو شكل التواصل

عندهم راسي من فوق لى تحت ... وده تصور اساسو الدين

والطائفه والايدلوجيا ... السودان ده ابدا ما قام فيهو نقاش

حقيقى ... ما قعدنا يا محمود فى الواطه دى ومسكنا ورقه

وقلم وحسبناها ... زمان فهمت سودانوية احمد الطيب زين العابدين

كده ... وكلامو عن ( البرش ) البنقعد فيهو كلنا بى شكل

دائري ... خيارهم الواحد ده بفرض علينا انو نناضل عشان

يصلوا ... يلبسوا جلابيه الديمقراطيه ويحكموا ... او بدله العساكر

وبرضو يحكموا ... والطريقه المعروفه قطر النضال بتاعم ده

عدد الرسائل : 216 تاريخ التسجيل : 30/03/2007

محمود

- حتى لو كان كلامك ده صاح ... وانا ما معاك فيهو ,

تبقى انت والهامش الكبير فى السودان السبب الحقيقى ... السلطه

مسلمه موجوده .. وحتكون موجوده تخدم فى مصالحها وحتى وانت

سلبى معاها يتهبشك ... السلبيه والصوت المافى بتاعك ده خلى

احساسك بالهزيمه متضخم جدا .. الهزيمه يا منعم شرك وقعت فيهو

... وين قدرتك على ابداع نضالك .....؟ انت طلعت من السودان

ليك سنوات طويله ... ولسه سلبي قدام هزيمتك , ما قادر او

ما عاوز تتعامل معاها ... عايش ليك فى سراب داخلى ...

وبتدير مع نفسك منلوجات داخليه .. حتى نفسك عملت منها داخليه

وقعدت فيها ... انت يا منعم ما حاولت مره تنزل السودان عشان

على الاقل تجدد احساسك بيهو .. اتحول السودان جواك لى

فكره ثابته ما بتتحرك ... اتحولت الفكره دى لى طوطم .. صدقنى

يا منعم الخيار ما واحد , الخيارات لسه مفتوحه , فى عوالم

لسه راجياك ... انا ما عاوزك تنفض التجربه بتاعتك .. انا عاوزك

تبنى عليها ... الناس لسه حيه وبتتحرك ... عارف يا منعم اول

احساس جانى يوم اتولدت هبه ... شفتها وسط مجموعه من

الاطفال ... عرفتها , بت سودانيه صاح ... حسيت بالابداع ... بالتجديد

.. بالامتداد فى بكره ... حسيت انو غنانا القبيل داك ممكن يتحقق

.. اولادنا السمر يا منعم .. افراحنا البنمسح بيها احزان العمر

.. ده ما زمن الاسئله الكبيره ... ده زمن الاسئله الصغيره والبسيطه

... التفاصيل اليوميه ... وصدقنى يا منعم اجابات الاسئله الصغيره دى

هى البتقودنا للاجابات الكبيره ... الكميات الكبيره دايما بتقودنا للفوضى

... الشرائح الصغيره هى الربطت العالم .... انا آسف , لكن من

حقى اتكلم معاك ... كلامى معاك ده جزء من حواراتى مع

ساميه ... مشغولة بيك كتير ...وحقيقى عاوزنك تتطلع من الجو

الداخلى العايش فيهو ... اطلب ليك بيره ... منعم , منعم

عدد الرسائل : 216 تاريخ التسجيل : 30/03/2007

آه يا محمود ... لا تعلم كم هو موجع انتزاع هذه

الخلايا ... كم هو موجع النزوع اليها ... كم هى موجعه حيث

هى الان .. اعلم ان هذه المسارات الثلاثه غير متوازيه , تقاطعها

داخل هذا الجسد وخارجه ليس خيارا ... ولكن , هذا انا ... تماما

كما قال التشكيلى كاظم العراقى ( هذا انا .. هذا جسدى

اراه فى الرؤيا من الداخل ... كما كنت اراه وانا فاقد الوعى

.... انا استقرئ ولا احلل .. هى الرؤيا تركتها لحالها فانطلقت

حرة مثلما رأيتها ...)

عدد الرسائل : 216 تاريخ التسجيل : 30/03/2007

طافت تلك الخاطره بذهن منعم وهو يسترجع بعض الذكريات التى

بدت موغلة فى القدم .. وكأنها كانت منذ الازل .. كانت قد مضت

بضعة اشهر كالحات منذ استشهاد احمد بين يديه واعتقاله الذي دام

اياما معدودات بدت كدهور عجفاء كرست احساسه المقيم بالعطش

... خرج من المعتقل ذات ليل حين قادوه بعربة وهو معصوب العينين

وانزلوه فى ميدان ابو جنزير ... كان فاقدا لاى احساس بالزمن ..

تطارده صوره احمد احيانا واحيانا صور زبانيه الامن الغلاظ .. واخذ يمشى

ويمشى صوب امدرمان .. طافت صورة سلمى بخاطره عند اجتيازه الكوبري

... وقف طويلا امام قبه الامام المهدى حتى زجرته احدى دوريات الشرطه

طرق باب بيتهم طويلا قبل ان تفتح امه الباب .. لم يبكى على احمد الا

فى حضن امه التى بادلته البكاء والقبل طويلا .. تردد كثيرا ضحى اليوم

التالى فى الذهاب الى الجامعه .. كان اكثر ما يخافه رؤيته لعيون

سلمى يجللها الاسى .. لا لم يكن يخاف الاسي بعيونها .. كان يخاف تلك التهمه التى ما استطاع نفيها قط ..

كان يخافها ان تطل من عينيها .... هل كنت يا منعم مسؤولا عن موت احمد ؟ ..

.. اواه ما هذا الجحيم . استقبله الطلاب بحفاوة فاقت حتى تصوراته .. تجمعوا

حوله معزين ومباركين .. بحثت عيناه طويلا عن سلمى .. لم يجدها ..

ولن ... لم يلتقيها الا بعد عدة اشهر للحظات قليله توقف عندها الزمان .. توقفت كرته

الارضيه عن الدوران .. توقف قلبه قليلا قبل ان يتأكد من تهمته تنطق

بها عيون سلمى فى جرأة ووثوق .. كان ذلك بمنزل نسرين .. مرت

ايام قليله قبل ان يلتقيها جوار قاعة سيد المبارك بكليه الصيدله ذات

نهار كالح ... تبادلنا التحايا سريعا قبل ان تقول

- منعم ... انت عارف كويس انو مافى فايده .. هكذا ومضت

.

عدد الرسائل : 216 تاريخ التسجيل : 30/03/2007

آه يا سلمى ... لماذا تركتينى وحيدا .. زبونا لكل المطارات

البعيدة , والبلاد الماسخه , والشوارع الجحيم ... اشتاق لطعم

الحليب فى غياب ( سيد اللبن ) ... وأزرع الشوارع بالقصائد

والغياب ..

عدد الرسائل : 216 تاريخ التسجيل : 30/03/2007

وتريد لى يا محمود الآن حبيبة اخري واطفالا قصائد وتفاصيل

اخري رحيمه ..؟

تريد لى يا محمود وطنا اكونه مناضلا وعاشقا وفارسا نبيل ؟؟..

ليس لى الان هذا الوطن ... ذاك التراب الهناك .. محض

تراب .. محض شموس لا تجي الا بالنهارات الزيف والطيور

الميته والمحاذير ... وطن لا يلبى اشتهاءاتنا البسيطه ... ويغتال

حلم اغانينا الفارهات .. تراب لا نطير اليه عشاقا فنلقى

عشاقا ... وطن يقابضنا حبه بالنزيف .. ولكنى ارفض المساومة ,

اذن .. ليس عندى الا ان اتم قصيدتى قبل القيام الاخير

ثم اغيب .. اغيب اليها .. فلسلمى ما تبقى من رحيق ..

ولى منها زاد الاف المساءات المقبله ذات المطر الشجين ,

وخاطر .. وقصيدتين .... وارض الله واسعه .. وستكون واسعه

حتى يغادرنى الحنين .. هكذا اعلن محمود درويش , نعم

الخيارات مفتوحه .. ولكنها غير مستقله لان المسارات غير

متوازيه .. تتقاطع حتما بفعل المساوقه اللااراديه نحو نهايات

متواطأ عليها سلفا .. اذن لا وجود للخط المستقيم .. هذي

هى ثقافة الدوران التى ارفضها .. وانت ما زلت تدور

بسيارتك الصغيره , والمدينة تلبس ثوب دعارتها كى تتعري

من هذا الزيف العالق فى عيون ساكنيها .. وتدعوهم

للجحيم .

.

عدد الرسائل : 29 تاريخ التسجيل : 15/04/2007

Copy , Paste , Print

عشان هذا الإبداع لا يحتمل القراءة على عجل

مشرف عدد الرسائل : 489 تاريخ التسجيل : 04/04/2007

ود المشرف ياخي بجيك برواااقة ..
ياخي ده شغل ما ساهل ..
الله يديك العافية ياخ ..

عدد الرسائل : 216 تاريخ التسجيل : 30/03/2007

نقترب الان من منزل محمود .. يزداد يقينى ان لمحمود ما يخفيه

مما زاد توتري .. ما عدت اطيق المفاجأءات .. اصبحت اضيق

بالاجواء الاجتماعيه المفروضه والغير متوقعه .. اسخف ما فيها

الاسئله والتى يعتبرها السودانيون حقا مشروعا لهم وان كانت

تخص اكثر اشياءك خصوصيه ... هيأت نفسي للاستباحه والتى

ستبدأ من ساميه وبطريقتها المحببه , وقد تنتهى بغرباء لا قبل

لى بهم .. ومحمود ما زال يثرثر عن الصغيره هبه وهواجس

الغربه والعمل حتى توقفت بنا السياره وهممت بالنزول ... فاستوقفنى

محمود ضاحكا

- دقيقه بس نتجهز قبل ما نقابل الحكومه ..

- كيف يعنى ؟..

اخرج من درج السياره زجاجه عطر وبخاخ معطر للفم فادركت

ان محمود يحاول ان يدارى سوأة سكره .. اشار ضاحكا

- عدة الشغل

ضحكت هازئا

- والله طليعيين آخر زمن .. مش دى ساميه الكنت زمان

بتشيل منها الشير بتاع العرقى ايام الجامعه !!..

- ساميه اصلا كانت جبهه ديقراطيه ايام الجامعه .. اتخرجت

بقت ديقراطيه .. بعد العرس غيرت رايها و بقت جبهه بس .. وجبهه

عنيده كمان

استقبلتنا هبه اولا وهى تتعثر فى مشيتها وتتمتم با .. با با ....

اما ساميه فقد شرعت فورا فى هجومها العنيف والمتوقع

- منعم .. وين انت ليك شهور ما شفناك ... ومالك ضعفان

كده , وانتو عيونكم مالا محمره كده ليه .. و .. وانهارت كل

خطوط محمود الدفاعيه

مشرف عدد الرسائل : 394 تاريخ التسجيل : 19/03/2007

انا غايتو قررتة اكمل الرواية اول حتى التعليق

بس عندى اقتراحات لطباعة الرواية

عدد الرسائل : 216 تاريخ التسجيل : 30/03/2007

أبورزقة كتب:: Copy , Paste , Print

عشان هذا الإبداع لا يحتمل القراءة على عجل

ابورزقه سلامات

غايتو انت بالسناريو العملتو من موقف بحري حتى

مسوحة الزيت والملح مرورا بمحل العرديب والجمري

ما خليت لينا النكتبو ...

حتخلينى خرمان حتى اشعار آخر

عدد الرسائل : 216 تاريخ التسجيل : 30/03/2007

ود الإمام كتب:: ود المشرف ياخي بجيك برواااقة ..
ياخي ده شغل ما ساهل ..
الله يديك العافية ياخ ..

ود الامام

سلامات

يا خى جد اصلو ما بتتخيل سعادتى

بقراية كلمات زى دى

الله يديك العافيه ..

عدد الرسائل : 216 تاريخ التسجيل : 30/03/2007

هادية كتب:: انا غايتو قررتة اكمل الرواية اول حتى التعليق

بس عندى اقتراحات لطباعة الرواية

هاديه ازيك ..

انا ما حأقبل بأقل من .. من

الف دولار كندى

عدد الرسائل : 216 تاريخ التسجيل : 30/03/2007

طيب 500 دولار ... كيف ؟..

عدد الرسائل : 216 تاريخ التسجيل : 30/03/2007

100 دولار والدنيا اخر شهر وما تتغطى على اكتر من كده

.

مشرف عدد الرسائل : 394 تاريخ التسجيل : 19/03/2007

قمنا للطمع

عدد الرسائل : 29 تاريخ التسجيل : 15/04/2007

أهااااااااااااا

الشغلة جابت ليها دولارات

دي زاااااتة الطفشتنا من العرديب والجمري

خلاص أهة Delete وبقراها هنا بس ..

خلي عيوني دي التنقد

مشرف عدد الرسائل : 489 تاريخ التسجيل : 04/04/2007

أبورزقة كتب:: أهااااااااااااا

الشغلة جابت ليها دولارات

دي زاااااتة الطفشتنا من العرديب والجمري

خلاص أهة Delete وبقراها هنا بس ..

خلي عيوني دي التنقد

أحب الدولارات ..البتغيير إتجاهات الناث ..
Very Happy

يا هادية ياخ أدفعو للمشرف ما يستحقه ..وعملو لا يقيّم بالفلوس ياخ ..بطلّوا (الجلندة) دي .. Very Happy

زكان دفعتو ليهو (كويث) ..أنا زاتي بكتب Very Happy

عدد الرسائل : 216 تاريخ التسجيل : 30/03/2007